|
||||||||||||||||||||||||||||||||||||||||
|
|
||||||||||||||||||||||||||||||||||||||||
 |
Հայոց հողի հրաշալիքները → Հայաստան → Վանքեր, եկեղեցիներ → Սրվեղ Սրվեղի վանք
Սրվեղի վանքը գտնվում է ՀՀ Տավուշի մարզի Այգեհովիտ (նախկինում՝ Ուզունթալա) գյուղից 3 կմ դեպի հարավ-արևելք, անտառի խորքում, ընդարձակ սարահարթի վրա: Բաղկացած է երկու պարիսպների մեջ ամփոփված եկեղեցուց և այլ շինություններից: Կիրանց վանքից հետո Սրվեղի վանքը երկրորդ աղյուսաշեն հուշարձանախումբն է: Վանքի գլխավոր՝ Ս. Նշան եկեղեցին կառուցվել է 1252-ին: Այդ մասին է վկայում հյուսիսային պատի վրա, ավազանից արևմուտք պահպանված արձանագրությունը, որտեղ ասվում է, որ եկեղեցին կառուցել են Արտավազն ու Սարգիսը Հովհաննեսի ձեռքով: Իսկ 1692-ին Աստուհի որդի Մխիթարը նորոգել է եկեղեցու երկու դռները: Ս. Նշան եկեղեցին գմբեթավոր սրահ է, արևելյան կողմում կիսաշրջան աբսիդով ու կրկնահարկ խորաններով: Երկրորդ հարկի խորանների հետ կապը իրականացված է եկեղեցու բեմից բացվող դռներով ու աստիճաններով: Աստիճանները սկսվում են աբսիդից ու բարձրանում պատի բարձրության միջով: Բոլոր կամարները սլաքաձև են, գմբեթը 12 նիստանի բարձր թմբուկով վեր է խոյանում ամբողջ ծավալի նկատմամբ: Սրվեղ անվանումը կապվում է հենց գմբեթի հետ, որն ունի սուր, սրածայր վեղար: Եկեղեցու մուտքերը երկուսն են՝ հյուսիսային և արևմտյան կողմերից: Հատկանշական է, որ թեև եկեղեցին հիմնականում կառուցված է թրծած աղյուսով, սակայն նրա հիմնապատերը շարված են մուգ վարդագույն սրբատաշ քարերից: Վանքը տարբեր ժամանակներում բազմիցս նորոգվել է, ինչի վառ ապացույցն է եկեղեցու պատերի մեջ հանդիպող խաչքարերի բեկորներն ու ծեփի հետքերը: Քանդակազարդ ու արձանագրված բեկորներից մեկի վրա նշված է 1201 թվականը: Հետագայում վանքի հյուսիսային կողմում, պարսպի ներսում կառուցվել է փայտածածկ մի ուրիշ եկեղեցի: Եկեղեցու մկրտության ավազանի խորշի կողքին գտնվող արձանագրությունը հայտնում է, որ եկեղեցին կառուցել է գյուղի համայնքը 1889-ին, Հովհաննես քահանայի առաջնորդությամբ: Վանքի մյուս շինությունները՝ շրջապարիսպը, խցերը, ձիթհանը բոլորովին ավերված են: Կավե խողովակներով դեպի վանքն է բերվել ՙԿեուռ՚ (ՙՅորդ՚) աղբյուրը: Այժմ այն չի գործում, սակայն պահպանվել են կավե խողովակների հետքերն ու ջրավազանը: Սրվեղի վանքի շրջակայքում կան գյուղատեղիներ ու գերեզմանատներ, որոնք ծածկված են թանձրախիտ անտառներով:
|
|
||||||||||||||||||||||||||||||||||||||
|
||||||||||||||||||||||||||||||||||||||||
